Electroneg gynaliadwy

Mae dyfeisiau electronig yn defnyddio trydan i weithio ac yn cynnwys pethau fel ffonau, cyfrifiaduron, setiau teledu a chonsolau gemau. Gall y dyfeisiau hyn wneud ystod eang o bethau fel dangos fideos, chwarae gemau, neu ei gwneud hi'n bosibl cysylltu â dy ffrindiau a dy deulu.

Datblygiadau technolegol

Mae arloesi parhaus mewn technoleg yn cyflwyno dyfeisiau electronig newydd gyda swyddogaethau a chyfleusterau newydd. Gall hyn greu galw am y cynnyrch diweddaraf.

Diwylliant defnyddwyr

Mae’n bosibl bod pwysau gan ddefnyddwyr ac ymgyrchoedd hysbysebu, yn enwedig drwy’r cyfryngau cymdeithasol, wedi arwain at awydd cynyddol am y teclynnau diweddaraf. Mae hyn wedi cyfrannu at gynhyrchu a phrynu mwy o ddyfeisiau electronig.

Cyfleustra

Mae dyfeisiau electronig yn gwneud gwahanol swyddogaethau ac yn gwneud pethau’n gyfleus, felly mae pobl yn gallu teimlo nad ydyn nhw’n gallu gwneud hebddyn nhw yn y byd modern. Mae hyn yn golygu bod galw mawr am eitemau fel ffonau symudol, setiau teledu, cyfrifiaduron a pheiriannau golchi llestri ac mae hyn yn gyrru eu cynhyrchiad.

Gyda’i gilydd, mae’r ffactorau hyn yn cyfrannu at y cynnydd mewn cynhyrchu electronig, gan gynnal cylch o alw gan ddefnyddwyr a datblygiadau technolegol.

Mae creu a defnyddio dyfeisiau electronig yn dod â llawer o fanteision i’n bywydau. Maen nhw’n dylanwadu’n gadarnhaol ar ein cymdeithas, gan gyfrannu at fwy o gysylltedd a hwylustod, ar yr un pryd â rhoi hwb i’n heconomi. Fodd bynnag, gall electroneg niweidio ecosystemau ac amgylcheddau ein planed yn sylweddol, sy'n ei gwneud yn anoddach cael ffordd gynaliadwy o fyw.

Manteision electroneg

Anfanteision electroneg

Mae effaith amgylcheddol ffonau symudol yn ymestyn o ddechrau i ddiwedd eu bywydau, o weithgynhyrchu i waredu. Mae angen llawer o adnoddau ac egni i’w cynhyrchu. Mae hyn yn cyfrannu at lygredd, dinistrio cynefinoedd, ac allyriadau nwyon tŷ gwydr.

Mae’r gwaith o ddylunio ffonau symudol yn aml yn digwydd mewn Gwledydd Incwm Uchel (HIC) lle mae gan gwmnïau rhyngwladol eu pencadlysoedd.

Mae’r cydrannau a’r rhannau ar gyfer ffonau symudol yn aml yn dod o wahanol wledydd ac yna’n cael eu cydosod mewn ffatrïoedd mewn gwahanol ranbarthau o Wledydd Incwm Canolig (MIC) neu Wledydd Incwm Isel (LIC).

Ar ôl eu hadeiladu, mae ffonau symudol yn cael eu hallforio ledled y byd, sy’n golygu bod allyriadau cludiant yn ychwanegu at ôl troed carbon cyffredinol y ffôn. Yn ogystal, mae defnyddio egni yn ystod oes y ffôn a chynhyrchu gwastraff electronig yn achosi heriau amgylcheddol pellach.

I fynd i’r afael â’r materion hyn, mae prosiectau’n canolbwyntio ar:

• wneud i ffonau bara’n hirach
• defnyddio mwy o ddeunyddiau wedi’u hailgylchu
• hyrwyddo nodweddion arbed egni
• rheoli gwastraff electronig yn well
• sicrhau bod pobl yn gwybod mwy am y materion hyn

Drwy ddewis opsiynau cynaliadwy, cadw ein teclynnau i fynd yn hirach, a chael gwared ar hen rai’n briodol, gall unigolion helpu i leihau effaith eu ffonau clyfar.

Pan nad yw gwastraff electronig yn cael ei waredu’n gyfrifol, mae’n llygru’r amgylchedd gyda chemegion peryglus. Gall hyn achosi problemau iechyd i bobl sy’n byw mewn cymunedau ger safleoedd tirlenwi.

Mae hefyd yn gwastraffu adnoddau gwerthfawr. Mae dyfeisiau electronig yn cynnwys metelau a deunyddiau gwerthfawr fel aur, arian, copr a phrinfwynau. Pan na fydd gwastraff electronig yn cael ei ailgylchu neu ei adennill yn iawn, caiff yr adnoddau hyn eu colli a rhaid gwneud gwaith cloddio ac echdynnu ychwanegol i gael rhai yn eu lle.

Problem arall o ganlyniad i waredu gwastraff yn y ffordd anghywir yw’r posibilrwydd o risgiau diogelwch data. Mae gwybodaeth sensitif yn aml yn cael ei storio ar ddyfeisiau fel cyfrifiaduron a ffonau symudol a gall pobl gael mynediad ati heb awdurdod priodol. Gall hyn arwain at ddwyn hunaniaeth, rhannu gwybodaeth sy’n breifat, a bygythiadau eraill i seiberddiogelwch.

Ailgylchu hen electroneg drwy fynd â nhw i ganolfannau ailgylchu dynodedig.

Rhannu’r neges drwy ddweud wrth eraill pam ei bod yn bwysig ailgylchu electroneg.

Gwerthu dy hen eitemau - bydd hyn yn rhoi cyfle i ti roi bywyd newydd i dy hen electroneg drwy eu gwerthu i rywun a allai fod eu heisiau. Mae hyn yn golygu bod yr eitem yn cael ei defnyddio yn hytrach na’i thaflu i ffwrdd.

Atgyweirio - bydd hyn yn osgoi gorfod taflu eitemau electronig i ffwrdd.

Mae technoleg yn chwarae rhan ganolog yn ein bywydau bob dydd, gan gynnig hwylustod, cysylltedd ac arloesedd. Fodd bynnag, mae cyflymder datblygiadau technolegol hefyd wedi arwain at bryderon amgylcheddol.

Mae hyn yn cynnwys gwastraff electronig, defnyddio egni, a disbyddu adnoddau. Drwy fabwysiadu arferion sy’n lleihau gwastraff electronig, yn gwarchod egni, ac yn cefnogi technolegau cynaliadwy, gallwn leihau ôl troed ecolegol ein defnydd o dechnoleg.

Mae gan Gymru nifer o brosiectau ledled y wlad i leihau’r effaith negyddol y gall ein dyfeisiau ei chael ar yr amgylchedd.

Deddfwriaeth

Mae cyfreithiau ar waith i sicrhau bod gweithgynhyrchwyr yn gyfrifol am eu gwastraff electronig. Er enghraifft, mae cyfreithiau’n mynnu bod cwmnïau’n cael gwared ar eu cynnyrch yn briodol hyd yn oed pan nad oes modd eu defnyddio mwyach.

Prosiectau cymunedol

Mae caffis trwsio a gwasanaethau atgyweirio symudol yn gweithredu ledled Cymru. Mae’r cynlluniau hyn yn ymestyn oes electroneg trwy gynnig gwasanaethau atgyweirio i’r cyhoedd.

Canolfannau casglu e-wastraff

Mae gan Gymru nifer o ganolfannau casglu e-wastraff sy'n sicrhau gwaredu ac ailgylchu cyfrifol.

Economi gylchol

Nod Cymru yw parhau i leihau faint o e-wastraff sy’n cael ei greu a meithrin economi gylchol. Mae economi gylchol yn ffordd o wneud pethau lle rydyn ni’n ceisio defnyddio adnoddau mor effeithlon â phosibl.

Yn hytrach na thaflu pethau i ffwrdd ar ôl eu defnyddio unwaith, rydyn ni’n dod o hyd i ffyrdd o’u hailddefnyddio, eu hatgyweirio a’u hailgylchu. Mae hyn yn helpu i leihau gwastraff a gwarchod yr amgylchedd ar yr un pryd ag arbed arian a chreu cyfleoedd newydd i fusnesau.

Mae lleoliadau fel y Bathdy Brenhinol yn Llantrisant yn adeiladu ffatri gemegol sy’n gallu echdynnu aur o wastraff electronig, fel hen liniaduron a ffonau symudol. Mae’r dull eco-gyfeillgar hwn yn lleihau’r defnydd o egni ac mae’n well i’r amgylchedd.

Addysg

Mae gwahanol grwpiau a chynghorau’n cynnal ymgyrchoedd i addysgu pobl mewn ysgolion a’r gymuned am e-wastraff a sut mae’n effeithio ar yr amgylchedd.