Uisge

Feumaidh a h-uile nì beò uisge. Faigh a-mach carson a dh'fheumas sinn uisge.

Mura cuir thu uisge air planntraisean…

• tiormaichidh iad agus bidh na duilleagan aca crom
• seacaidh an dath agus tòisichidh duilleagan uaine a' fàs ruadh
• mu dheireadh, bàsaichidh iad.

Feumaidh daoine cuideachd uisge airson a bhith fallain.

'S e uisge a th' ann an còrr is 60% dher bodhaig. Sin còrr is leth dher bodhaig!

Carson a dh'fheumas sinn uisge?

• Bidh uisge a' cumail ar bodhaigean ag obrachadh gu math agus gar cumail fiot agus fallain.
• Bidh sinn a' call uisge a h-uile latha ann am fallas, ar n-anail agus a' dol dhan toidhleat.
• Feumaidh sinn an t-uisge seo a chur air ais le bhith ag òl agus ag ithe.

Dòighean air cumail gun tiormachadh

Feumaidh tu uisge a ghabhail airson gun obraich do bhodhaig ceart agus nach tiormaich e.

• Gabh eadar sia agus ochd cupannan uisge gach latha. Bu chòir clann fo 8 bliadhna eadar ceithir agus sia cupannan a ghabhail. Cuimhnich gum bi sinn cuideachd a' faighinn uisge bho bhiadh agus bho dheochan eile, mar bainne.
• Gabh barrachd uisge air latha a bhios tu a' gluasad tòrr. Mar eisimpleir, nuair a bhios tu a' cluich ball-coise, a' dannsa no a-muigh air a' bhaidhsagal, bidh do bhodhaig a' call barrachd uisge.
• Òl barrachd air latha teth. Bidh do bhodhaig a' call barrachd uisge nuair a bhios fallas a' tighinn tromhad.
• Gabh deoch leis a h-uile biadh. Seo dòigh fhurasta air barrachd uisge a ghabhail.
• Cùm botal uisge ri do thaobh tron latha.
• Gabh biadh anns a bheil tòrr uisge. Tha tòrr uisge ann am measan agus lusan mar subhan-làir agus cularain. Tha brot cuideachd math airson barrachd uisge a ghabhail.

Cliog tron taisbeanadh agus faic dòighean air cumail gun tiormachadh.

Dè thachras mura gabh sinn uisge gu leòr?

• Mura gabh sinn gu leòr uisge, bidh am pathadh oirnn, bidh sinn sgìth agus cha bhi sinn a' faireachdainn gu math.
• Mura gabh sinn gu leòr uisge, tiormaichidh sinn (cha bhi uisge gu leòr nar bodhaigean airson obrachadh ceart).
• 'S e uisge òl aon de na rudan as fhasa agus as fheàrr airson a bhith fallain.

Feuch air na ceistean seo agus faic dè as aithne dhut mu uisge san daithead.

Dùbhlan

Dealbh agus tarraing postair a bhrosnaicheas do charaidean gu bhith ag òl barrachd uisge.

Feuch ri seo a chur ann:

• fiosrachadh air carson a dh'fheumas sinn uisge òl
• beachdan do chlann leis nach toigh uisge barrachd dheth òl. Mar eisimpleir, ga chumail sa frids no a' cur slisean mheasan ann airson blas.