Ciamar a bhios a' ghaoth a' toirt buaidh air beatha làitheil?

Faodaidh a' ghaoth buaidh a thoirt air ar beatha làitheil ann an iomadh dòigh.

San artaigil seo gheibh thu a-mach:

• Mu bhuannachdan agus eas-bhuannachdan gaoithe
• Mar a ghabhas gaoth a chleachdadh airson lùth a ghintinn
• Mu aimsir ghaothach dhian mar gèiltean agus tornàdothan

Tha an goireas seo freagarrach airson topaigean Aimsir airson Clas 2, Clas 3, Clas 4, Clas 5, Clas 6 agus Clas 7 (A' Chiad agus An Dàrna Ìre de Churraicealam airson Sàr-mhathais).

Coimhead a' bhidio agus faigh a-mach mar a bhios gaoth a' toirt buaidh air ar beatha agus air an t-saoghal mun cuairt oirnn.

Buannachdan

• Tha sìde le oiteagan làidir math airson itealagan agus airson nigheadaireachd a thiormachadh a-muigh.
• Bidh gaoth a' gluasad teas agus taiseachd air falbh bho ar bodhaigean. Canaidh sinn factar fuachd na gaoithe ris a seo agus faodaidh e ar cumail fionnar air làithean teth.
• Tha gaoth cuideachd cudromach ann an nàdar. Bidh i a' cuideachadh cuid de lusan sgaoileadh le bhith a' sèideadh an t-sìl aca gu talamh ùr.
• Bidh i a' sèideadh air falbh ceò agus truailleadh ann am bailtean-mòra agus ga dhèanamh nas fhasa dhuinn faicinn agus nas fhallaine a' tarraing anail.
• Thèid againn air dealan a ghintinn le tuirbinean gaoithe.

Eas-bhuannachdan

• Faodaidh gaoth làidir buaidh a thoirt air mar a bhios sinn a' siubhal. Faodaidh uspagan gaoithe dràibheadh a dhèanamh doirbh gu h-àraid do bhusaichean agus do làraidhean. Chan fhalbh plèanaichean, aiseagan no trèanaichean ma tha i uabhasach fiadhaich chionn bidh gaoth mhòr a' ciallachadh nach bi e sàbhailte siubhal.
• Faodaidh factar fuachd na gaoithe toirt oirnn teas bodhaig a chall nas luaithe agus bidh sinn a' faireachdainn fiù 's nas fhuaire air latha fuar.
• Faodaidh fuachd na gaoithe lusan a mhilleadh agus 's dòcha gun tiormaich na duilleagan.
• Faodaidh gaoth mhòr eòin-imrich a chur far an cùrsa no an dèanamh sgìth.
• Faodaidh gèiltean a bhith cho làidir 's gum falbh taidhlichean far nan taighean agus gum bris geugan chraobhan.

Tornàdothan

• Tha cuid dhe na gaothan as làidire air an clàradh air an Talamh rim faotainn ann an tornàdothan.
• 'S e colbh èadhair a' toinneamh aig astar a th' ann an tornàdo agus bidh e air a chruthachadh eadar sgòthan stoirme agus an talamh.
• Faodaidh iad tòrr millidh a dhèanamh le bhith a' leagail thogalaichean 's chraobhan.
• 'S ann anns na SA as motha a tha dhe na tornàdothan air an t-saoghal.
• San RA, bidh mu 30-50 tornàdo againn gach bliadhna ach 's àbhaist dhaibh a bhith gu math beag agus cha bhi iad uamhasach millteach.

• factar fuachd na gaoithe - Nuair a bhios gaoth a' sèideadh mun cuairt oirnn, 's dòcha gum fairich sinn i nas fhuaire na tha teòthachd na h-èadhair dha-rìribh chionn bidh gaoth a' gluasad teas agus taiseachd air falbh bho ar bodhaigean. Canar factar fuachd na gaoithe ris a seo.
• tuirbinean gaoithe - Muilnean-gaoithe mòr le lannan a bhios a' dol mun cuairt agus a' cur car de ghineadair agus a' dèanamh dealan.
• uspag - Gaoth làidir a shèideas gu h-obann agus nach sèid ro fhada.
• gèile - Gaoth uabhasach làidir.
• tornàdo - Seòrsa de stoirm anns am bi a' ghaoth a' cur charan ann an colbh eadar na sgòthan agus an talamh.

Dealbhaich itealag cho-chothromach

Tha gaoth lag uabhasach math airson itealagan. Feuch fhèin ri itealag a dhealbh airson latha gaothach. Feuch a-mach diofar dhathan 's phàtrain!

Cuimhnich…

Bidh cumadh 2sh co-chothromach ma ghabhas loidhne a tharraing troimhe 's gum bi gach taobh dhen loidhne a' coimhead an aon rud.

Faigh a-mach mar as urrainn dhuinn gaoth a chleachdadh airson dealan ath-nuadhachail a ghintinn.